Türk Dövlətləri Təşkilatının (TDT) kənd təsərrüfatı paytaxtı olan Quba şəhərində Rəqəmsal Aqro Data Platformasının yaradılması ilə bağlı iclas keçirilir. Bu haqda ShimalNews 17 iyul tarixində məlumat verir.
Tədbirdə Azərbaycan, Türkiyə, Özbəkistan, Macarıstan və Şimali Kipr Türk Respublikasının Kənd Təsərrüfatı Nazirliklərinin səlahiyyətli nümayəndələri və aidiyyəti qurumların ekspertləri iştirak ediblər. Kənd Təsərrüfatı Nazirliyinin Aparat rəhbəri Azad Cəfərli bildirib ki, platformanın yaradılmasında əsas məqsəd, ilk növbədə, üzv və müşahidəçi dövlətlər arasında vahid ticarət şəbəkəsinin yaradılması, data əsaslı təhlilin aparılması, kənd təsərrüfatı və onların emalı məhsullarının ixrac və idxal potensialının qiymətləndirilməsi, ixracın və idxalın təşviqi, statistikanın toplanması, aqrostatistika mərkəzlərinin fəaliyyətlərinin əlaqələndirilməsi və bu sahədə daimi əsasda fəaliyyət göstərən mərkəzlərin mütəxəssislərinin birgə fəaliyyətinin təşkil edilməsi, mübadilənin həyata keçirilməsi, hesabatların tərtib edilməsi, aqrar sahədə mövcud potensialın ölçülməsi və digər əlaqəli fəaliyyətlərin bir mərkəzdən idarə olunması və icrasının reallaşdırılmasından ibarətdir.
Görüşdə qurumların məsul şəxsləri və özəl sektor nümayəndələri platformanın yaradılması istiqamətlərinin müəyyən edilməsi ilə bağlı müzakirələr aparıblar.
İclas öz işini bu gün də davam etdirəcək.
