Quba, Qusar və Xaçmazda “Mədəni irsimiz: dünən və bu gün – Qarabağ abidələri” adlı sərgi təşkil olunub.
AZƏRTAC-ın məlumatına görə, Quba Soyqırımı Memorial Kompleksi tərəfindən təqdim olunan fotosərgidə iştirakçılara ətraflı məlumatlandırılıb.
Tədbirlərdə kompleksin əməkdaşı Abutalib Turabov kompleksin fəaliyyəti haqqında danışaraq, təşkil olunan sərginin mədəni irsimizin bərpası və qorunması istiqamətində gənclərimizin maarifləndirilməsi üçün mühüm əhəmiyyət kəsb etdiyini bildirib.
Sərgilərdə Quba Soyqırımı Memorial Kompleksinin mütəxəssisləri Ülkər Zeynalova, Zərifə Ağarzayeva və Səriyyə Abidova Prezident İlham Əliyevin diqqət və qayğısı sayəsində ölkəmizdə tarixi abidələrin tədqiqi, mühafizəsi və bərpası, mədəniyyət nümunələrinin beynəlxalq aləmdə təbliği və Azərbaycanın zəngin mədəni irsinin qorunması məqsədilə ölkəmizdə yerləşən yüzlərlə tarix-mədəniyyət abidəsində bərpa-konservasiya və yenidənqurma sahəsində aparılan işlərdən söhbət açıblar. Qeyd olunub ki, Qarabağda, işğaldan azad edilən ərazilərdə bərpa və quruculuq işləri sistemli və layihələndirilmiş şəkildə həyata keçirilir. İşğal dövründəki dağıdılan abidələrin bərpası yalnız bir tikinti prosesindən ibarət deyil. Bu, həm də xalqımızın kimliyini bərpa etməsi, itirilmiş dəyərləri yenidən əldə etməsi deməkdir. Hər bir abidə, hər bir daş xatirədir. Bu abidələrin bərpası bizə keçmişimizi unutmamağı, gələcəyimizi isə daha möhkəm və güclü qurmağı öyrədir.
Quba Soyqırımı Memorial Kompleksinin təşəbbüsü və Quba-Xaçmaz Regional Mədəniyyət İdarəsinin dəstəyi ilə keçirilən sərgilərdə, ümumilikdə, 100-dən çox iştirakçı maarifləndirilib.
