Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Vətən Naminə” Şəhid Ailələrinə Dəstək İctimai Birliyi Qusar, Quba və Xaçmaz rayonlarının şəhid övladları üçün xüsusi və mənəvi dəyəri olan bir layihəyə start verib.
Shimal.News xəbər verir ki, qrant layihəsi çərçivəsində həyata keçirilən Şuşa turu, Vətən müharibəsində canından keçmiş qəhrəmanların övladlarını Qarabağın azad edilmiş torpaqları ilə tanış etməyi, onlarda vətənpərvərlik ruhunu gücləndirməyi və bu müqəddəs torpaqlarla mənəvi bağ yaratmağı hədəfləyir.
Layihə rəhbərliyi bildirib ki, bu gün Şuşaya ayaq basan hər bir şəhid övladı bu səfəri tam haqq edir: “Bu torpaqlar onların atalarının qanı ilə azad olunub və bu ziyarət həm simvolik, həm də ruhani dəyər daşıyır”.
Tur zamanı iştirakçılar Şuşanın tarixi və mədəni abidələrini, həmçinin Vətən müharibəsinin izlərini yerindəcə müşahidə edəcək, eyni zamanda Qarabağın bərpa prosesinə şahidlik edəcəklər.
Bu təşəbbüs şəhid ailələrinə diqqət və qayğının davamlı olmasının bariz nümunəsi kimi dəyərləndirilir.
