Qubada XIII Beynəlxalq Multikulturalizm Qış Məktəbi davam edir. Bu barədə ShimalNews 23 fevral tarixində məlumat verir.
“Mədəni müxtəliflikdə birlik: Azərbaycan nümunəsində” adlı Qış Məktəbində Azərbaycan, Türkiyə, Braziliya, Rumıniya, Almaniya, Fələstin, Rusiya, Amerika Birləşmiş Ştatları, Gürcüstan, Pakistan, İraq, Bolqarıstan, Mozambik, Mərkəzi Afrika Respublikası, Suriya, Şri-Lanka, Çin və Yaponiya kimi ölkələrin aparıcı universitetlərindən 25 tələbə iştirak edir.
Qış məktəbinin iştirakçılarına Azərbaycandakı multikultural mühit, tolerant əhval-ruhiyyə, etnik-dini müxtəliflik, ölkəmizdə müxtəlif xalqların nümayəndələrinin, fərqli konfessiyaların dinc yanaşı yaşaması haqqında ətraflı məlumat verilir. Tələbələr “Şahdağ” Qış-Yay Turizm Kompleksində, Xaçmaz Tarix Diyarşünaslıq Muzeyində, Quba Soyqırımı Memorial Kompleksində olacaq, Qubada dağ yəhudilərinin kompakt yaşadığı Qırmızı Qəsəbədə yerli əhali ilə görüşlər keçirəcək, məscid, kilsə və sinaqoqları ziyarət edəcəklər.
XIII Beynəlxalq Multikulturalizm Qış Məktəbi Bakı Beynəlxalq Multikulturalizm Mərkəzinin (BBMM) təşkilatçılığı ilə keçirilib. Qış Məktəbi “Heydər Əliyev İli”nə həsr olunur və fevralın 26-dək davam edəcək.
