Ötən həftə təhsilverənlərin sertifikatlaşdırılması prosesinin 7-10 oktyabr tarixlərində keçirilən müsahibə mərhələsinin nəticələri açıqlanıb. Quba rayonunda fəaliyyət göstərən coğrafiya müəllimi Yeganə Sübhanverdiyeva da yüksək nəticə əldə edənlərdən biri olub.
Shimal.News-un məlumatına görə, Yeganə Sübhanverdiyeva 1961-ci ilin 17 noyabr tarixində Salyan şəhərində anadan olub. Orta təhsilini 1978-ci ildə Salyan şəhər 2 saylı orta məktəbində müvəffəqiyyətlə başa vurduqdan sonra Azərbaycan Dövlət Pedaqoji Universitetinin coğrafiya-biologiya fakültəsinə daxil olub.
1983-cü ildə ali təhsilini başa vuran Yeganə müəllimə əvvəlcə təyinatla Salyan rayonunun Dayıkənd məktəbində fəaliyyətə başlayıb. 1984-cü ildən isə ailə vəziyyəti ilə əlaqədar olaraq Quba rayonunun Alekseyevka tam orta məktəbində pedaqoji fəaliyyətini davam etdirib.
Peşəkar fəaliyyəti dövründə Yeganə müəllimə dəfələrlə “İlin ən yaxşı müəllimi” müsabiqələrində uğur qazanıb, Quba Rayon İcra Hakimiyyəti, Təhsil Şöbəsi və Təhsil İşçiləri Həmkarlar İttifaqı tərəfindən fəxri fərmanlar və qiymətli hədiyyələrlə təltif olunub. 2008-ci ildə o, “Respublikanın qabaqcıl təhsil işçisi” adına layiq görülüb.
2016-cı ildə müəllimlərin diaqnostik qiymətləndirmə imtahanında 54 bal toplayaraq rayon üzrə ən yüksək nəticələrdən birini göstərib.
Eyni zamanda, 2025-ci ildə keçirilən sertifikasiya imtahanın birinci mərhələsində 54 bal, müsahibə mərhələsində isə maksimum - 40 bal toplayıb.
