Qubada Milli Qəhrəman Albert Aqarunovun doğum günü ilə əlaqədar tədbir keçirilib. Bu haqda ShimalNews 26 aprel tarixində məlumat verir.
Şəhidlər Muzeyində I Qarabağ müharibəsi şəhidinin xatirəsini yad etmək üçün şəhid ailələri, Qırmızı Qəsəbə 1 saylı tam orta məktəbinin müəllim və şagird kollektivi bir araya gəliblər. Tədbirdə qonaqlar şəhidlərimizin, qazilərimizin Vətən torpaqlarının azadlığı uğrunda apardıqları mübarizədən danışıblar.
Çıxış edən şəhid anaları çıxışlarında Albert Aqarunovun şərəfli döyüş yolunun gənclərimizə nümunə olduğunu, 44 gün davam edən Vətən müharibəsində bir çox şəhidlərimiz kimi, onun da qanının yerdə qalmadığını vurğulayıblar.
Tədbir şagirdlərin qəhrəmana həsr edilmiş şeiri ilə davam edib. Sonda Albert Aqarunova həsr olunmuş videoçarx nümayiş edilib.
