“COP29 Yaşıl gələcək naminə meşələri qoruyaq” layihəsinin fəaliyyət proqramına uyğun olaraq Qubada tədbir keçirilib.
Shimal.News xəbər verir ki, Qımılqazma və Qəçrəş kəndlərində Qeyri-Hökümət Təşkilatlarına Dövlət Dəstəyi Agentliyinin maliyyə dəstəyi ilə “Mühit” Ekoloji Mühafizə İctimai Birliyi görüş həyata keçirib.
Bildirilib ki, Quba rayonu 53 min hektardan çox meşə fonduna malikdir. Üstəlik 115 min hektara yaxın meşə fondu olan Şahdağ Milli Parkının da əsas hissəsi regionun ərazisinə düşür. Ekoloji maarifçilik fəaliyyətinin aparılmasının əhəmiyyəti, bu məqsədlə mütəmadi olaraq iş aparılmasının vacib olduğu iştirakçıların diqqətinə çatdırılıb.
Qəçrəş kənd İcra Nümayəndəsi Ələkbər İsmayılov və Qəçrəş bələdiyyə sədri Faiq Mirzəliyev meşələrin qorunması və baş verə biləcək yanğın təhlükəsi ilə bağlı kənd camaatı ilə fərdi şəkildə iş aparıldığını qeyd edib.
Sonda tədbir iştirakçıları Qəçrəş və Qımılqazma kəndlərinə məxsus meşə ərazilərinin hər birində 2 ədəd xəbərdaredici lövhə bərkidiblər.
