Qubanın bağlarında yetişən 40.000 tona yaxın alma xarici ölkələrdə satılacaq. Bu barədə ShimalNews 10 dekabr tarixində Azərtac-a istinadən məlumat verir.
Quba-Xaçmaz zonasında 22.000 hektardan çox alma bağı mövcuddur. Bunun 13.000 hektardan çoxu Quba rayonunun payına düşür. Buradan ixrac olunacaq meyvə isə rayon üzrə məhsulun 65-70%-ni təşkil edir.
Quba Rayon İcra Hakimiyyətinin Sosial-iqtisadi inkişafın təhlili və proqnozlaşdırılması şöbəsindən bildirilib ki, xaricə göndərilən məhsulun həcminə görə Rusiya ilk pillədə durur.
Bağbanlar ixrac olunan almanı 0.50-1.50 manata topdan satırlar. Yerli bazarlarda keyfiyyətli almanın 1 kq-si 40-60 qəpiyə topdan təklif olunur.
