Qubada tanışını bıçaqlamaqda təqsirləndirilən Yusif Səmədovun cinayət işi üzrə məhkəmə prosesi başa çatıb. Bu barədə ShimalNews 3 yanvar tarixində Pravda.az-a istinadən məlumat verir.
Məhkəmənin hökmü ilə Yusif 7 il müddətinə azadlıqdan məhrum edilib. Təqsirləndirilən şəxs cəzasını ümumi rejimli cəzaçəkmə müəssisəsində çəkəcək.
Hadisə 30 iyun 2021-ci il tarixində, saat 19:00 radələrində “Əli Ticarət Mərkəzi”nin (H.Əliyev prospekti) ərazisində baş verib.
39 yaşlı Y.Səmədov həmin ərazidəki kafedə spirtli içki qəbul edib. O, sərxoş vəziyyətdə çölə çıxarkən yaxınlıqda tanışı, zərərçəkmiş Təyyar Səfərov və onun qohumu Elşənin birlikdə söhbət etdiklərini görüb və onlara yaxınlaşıb. Təyyar isə ona şəxsi söhbətlərinin olduğunu deyib, kənarlaşmasını istəyib. Lakin Yusif ona əhəmiyyət verməyib, onların yanından çəkilməyib.
Daha sonra onların aralarında mübahisə yaranıb, zərərçəkmiş şəxs Yusifi nalayiq ifadələrlə təhqir edib və itələyərək yıxıb. Təqsirləndirilən şəxs ticarət mərkəzinin yaxınlığında saxladığı avtomobilindən bıçaq götürüb və geri qayıdıb. O, Təyyarı təqib edərək ona çatıb, kürək və qarın nahiyələrinə üç zərbə endirib.
Məhkəmədə Yusif Səmədov ittiham olunduğu əməllər üzrə özünü qismən təqsirli bilib. O, ifadəsində göstərib ki, cinayət əməlini 4 aylıq körpə uşağına qarşı istifadə olunmuş nalayiq ifadələrə görə törədib.
