Bu gün adı “Forbes” jurnalının milyarderlər siyahısına daxil edilən, qubalı məşhur iş adamı Qod Nisanovun doğum günüdür.
Qod Semyonoviç Nisanov Quba rayonunun Qırmızı Qəsəbəsində 24 aprel 1972-ci ildə anadan olub. O, Rusiyanın ən varlı iş adamlarından biridir.
Nisanov Bakıda indiki Maliyyə-İqtisad Kollecində təhsil alıb. 1990-cı ildən Qod Nisanov Moskvada bizneslə məşğul olmağa başlayıb. O, Moskvada olan zaman iş adamı Telman İsmayılovun rəhbəri olduğu “AST” şirkətində işləyib.
Nisanov 2001-ci ildə Moskvanın Lyublino rayonunda şəriki Zarah İliyevlə birgə “Moskva” ticarət mərkəzini təsis edib. İş adamı 2005-ci ildə “Biskvit” şirkətini və “Ukrayna” hotelini, 2006-cı ildə “Avropa” hotelini alır. Qod Nisanov və Zarah İliyevin biznesi Rusiya prezidenti Vladimir Putinin yaxın dostu olan İlham Rəhimovla ortaq olmasından sonra daha da tez inkişaf etməyə başlayır. Hal-hazırda Qod Nisanov və Zarah İliyevin Moskvada təxminən 14 milyon kvadratmetr daşınmaz əmlakı var.
2014-cü ildə Nisanov və Moskva meri Sobyanin ölkənin ilk aqroklasteri, 85 hektar ərazisi olan Rusiyanın ən böyük topdan və pərakəndə ərzaq mərkəzi “Food City”ni açıblar.
Qod Nisanov 2014-cü ildə 115 ölkədəki icmaları birləşdirən Dünya Yəhudi Konqresinin vitse-prezidenti seçilib. O, 2014-cü ildə Rusiya Federasiyası Prezidentinin Sərəncamı ilə “Dostluq” ordeni ilə təltif olunub. Nisanov “Tərəqqi” medalı və “3-cü dərəcəli Vətənə xidmət” ordenlərinə layiq görülüb.
Qod Nisanovun adı “Forbes” jurnalının milyarderlər siyahısına daxildir. “Forbes”in verdiyi məlumata görə, onun indiki xalis sərvəti 3,9 milyard dollar təşkil edir.
Hazırda Nisanova “Kiyevskaya ploşad” şirkətlər qrupu, “Moskva” avtomobil ticarət mərkəzi, “Radisson Collection Hotel Moscow” (“Ukrayna”) hoteli, “Evropeyski” ticarət mərkəzi, “Radisson Royal” flotiliyası və s. məxsusdur. Onun rəhbərlik etdiyi şirkətlərdə 26 mindən artıq işçi çalışır.
