Rusiyanın Dövlət Dumasının deputatı, “Ədalətli Rusiya” partiyasının sədri Sergey Mironov Azərbaycan diasporuna qarşı yeni hücum mərhələsini elan edib.
Haqqin.az-ın məlumatına görə, S.Mironov bəyan edib ki, Ural bölgəsində azərbaycanlı diaspor liderinin oğlu Mütəvəlli Şıxlinskinin həbsinə şəxsən onun müraciəti səbəb olub.
Deputat qeyd edib ki, xüsusilə, Moskvanın 2 nəhəng ticarət obyektinin – “Sadovod” və “Food City” bazarlarının fəaliyyətinin yoxlanılmasını tələb edib. (Bu bazarlar Qubadan olan tanınmış milyarder - Qod Nisanova məxsusdur).
Xatırladaq ki, bir neçə gün əvvəl Yekaterinburqda azərbaycanlı diaspor rəhbəri Şahin Şıxlinskinin oğlu Mütəvəlli Şıxlinski Mercedes-Benz G-Class markalı avtomobillə xüsusi təyinatlı polis əməkdaşını vurmaqda ittiham olunaraq həbs edilib. Yerli məhkəmə onun 14 sentyabra qədər həbsdə saxlanılması ilə bağlı qərar çıxarıb. Mütəvəlli Şıxlinskiyə qarşı Rusiya Cinayət Məcəlləsinin 318-ci maddəsi (hakimiyyət nümayəndəsinə qarşı zor tətbiqi) ilə cinayət işi açılıb.
Bundan bir gün öncə isə Şahin Şıxlinskiyə qarşı eyni maddə üzrə – hakimiyyət nümayəndəsinə qarşı zor tətbiq etmə ittihamı ilə cinayət işi başlandığı məlum olub.
