Xaçmaz rayonunun Qocaqlı kəndində ekoloji təmizliyə yönələn nümunəvi addım atılıb.
Shimal.News-a daxil olan məlumata görə, kənd sakinlərinin şəxsi təşəbbüsü və topladıqları maddi vəsait hesabına ərazidə xüsusi zibil poliqonu yaradılıb.
Tullantıların atılması üçün quyu qazılıb, ərazi hasarlanıb və nəzarətin təmin olunması məqsədilə müşahidə kamerası quraşdırılıb. Layihənin icrası və idarə olunması birbaşa kənd sakinləri tərəfindən həyata keçirilir.
Sakinlər bildiriblər ki, poliqon həftə ərzində bağlı saxlanılır, yalnız istirahət günləri açılır və tullantılar planlı şəkildə həmin əraziyə daşınır. Bu mexanizm sayəsində kənd ərazisində tullantıların pərakəndə şəkildə atılmasının qarşısı alınıb, ümumi təmizlik və səliqə xeyli yaxşılaşıb.
Qocaqlı kəndində həyata keçirilən bu təşəbbüs yerli icmalar üçün həm ekoloji məsuliyyətin artırılması, həm də özünütəşkilin uğurlu nümunəsi kimi qiymətləndirilir.
