Kənd Təsərrüfatı Nazirliyi yanında Aqrar Xidmətlər Agentliyi (AXA) qəhvəyi mərmər bağacığının yayılmasının qarşısını almaq məqsədilə bioloji mübarizə tədbirlərinə başlayıb.
Shimal.News xəbər verir ki, BMT-nin Ərzaq və Kənd Təsərrüfatı Təşkilatının (FAO) dəstəyi ilə həyata keçirilən layihə çərçivəsində Zaqatala və Balakən rayonlarında samuray arıları təbii mühitə buraxılıb.
Bioloji mübarizə tədbirlərinin icrası və monitorinqi məqsədilə yerli və Türkiyədən dəvət olunmuş mütəxəssislərin iştirakı ilə Zaqatala və Balakən rayonlarına sahə səfəri də təşkil olunub.
Məlumata görə, samuray arılarının laboratoriya şəraitində yetişdirilməsinə artıq AXA tərəfindən başlanılıb. Gələcəkdə bu bioloji mübarizə üsulunun mərhələli şəkildə ölkənin digər regionlarında da tətbiqinin genişləndirilməsi, beynəlxalq təcrübənin öyrənilməsi və yerli şəraitə uyğunlaşdırılması nəzərdə tutulur.
Qeyd edək ki, samuray arıları qəhvəyi mərmər bağacığının yumurtalarını parazitləşdirərək zərərvericinin çoxalmasının qarşısını alır. Bu üsul zərərvericinin sayının azalmasına, kimyəvi pestisidlərdən istifadənin minimuma endirilməsinə və kənd təsərrüfatı bitkilərinin ekoloji cəhətdən təhlükəsiz şəkildə qorunmasına xidmət edir.
Samuray arılarının sahələrə buraxılması zərərvericinin yayılma səviyyəsi və aparılan monitorinqlərin nəticələri nəzərə alınmaqla həyata keçirilir.
