Qubanın tanınmış istirahət məkanı çəpərlənərək burada tikilən obyektlərin ərazisinə çevrilir. Bu barədə ShimalNews 2 fevral tarixində məlumat verir.
“Burası elə yer idi ki, bütün yerli vətəndaşlar və xarici turistlər gəlir, gəzir, şəkil çəkdirir, pikniklər təşkil edirdilər. Çox təəssüf, artıq hər yer zəbt edilir. Belə getsə, heç kim meşəyə pulsuz düşüb gəzə bilməyəcək”, - deyə sakinlər bildirirlər.
Deyilənlər Qəçrəş kəndinə aparan yolun kənarındakı meşə zolağına aiddir. Yerli camaat hazırda daha bir obyektin sürətlə tikintisinin həyata keçirildiyindən danışır.
Burada əvvəl “Qədim Quba” restoranı çəpərlənmədən fəaliyyət göstərirdi. Həmin məkan artıq sökülüb, ərazi isə dəmir torla hasarlanıb. Oxşar halları yol boyu müşahidə eləmək olar.
