Qubanın Xucbala kəndində qanlı olay baş verib.
Shimal.News-un əldə etdiyi məlumata görə, əslən Laçın rayonundan olan 36 yaşlı Şamama Salam qızı Kərimova kəsik-deşik xəsarətləri ilə ağır vəziyyətdə Quba Rayon Mərkəzi Xəstəxanasına yerləşdirilib. Həkimlər onun həyatını xilas etmək üçün təcili əməliyyata başlayıblar.
İlkin məlumatlara əsasən, 3 gün əvvəl kənd sakini Elməddin Abdulla oğlu Salıyev Sumqayıt şəhərində yaşayan Ş.Kərimovanı qaçırıb. Qadının qohumları onun yerini öyrənərək kəndə gəliblər. Burada yaranan mübahisə zamanı qadının qardaşı 31 yaşlı Murad Salam oğlu Məhərrəmov bacısına bıçaqla ağır xəsarətlər yetirib və hadisə yerindən qaçıb.
İddia edilir ki, Ş.Kərimova bundan əvvəl də ailəli olub, 2 övladı var.
Polis əməkdaşları tərəfindən cinayət əməlini törətməkdə şübhəli bilinən, M.Məhərrəmov saxlanılaraq istintaqa təhvil verilib.
Araşdırma aparılır.
