2026-cı il üzrə Gənclər üçün Prezident mükafatı verilib. Prezident İlham Əliyev bununla bağlı Sərəncam imzalayıb.
Mükafata layiq görülənlərdən biri də Sərxan Əbülfət oğlu Ağadadaşovdur.
"1999-cu il avqustun 4-də Qusar şəhərində anadan olmuşam. Orta təhsilimi Qusar şəhər 1 saylı tam orta məktəbində almışam. 2016-cı ildə Azərbaycan Aviasiya Akademiyasının Hava Hərəkətinin İdarə Olunması mühəndisliyi ixtisasına qəbul olmuşam. 2020-ci ildə bakalavr, daha sonra isə magistratura pilləsini eyni ixtisas üzrə bitirmişəm.
2023-cü ildən Aviasiya Akademiyasının doktoranturasında təhsil alıram. Eyni zamanda Akademiyanın Pilotlu Uçuş Aparatları (PUA) laboratoriyasında qrup rəhbəri və müəllim kimi fəaliyyət göstərirəm.
2020-ci ildən, xüsusilə Vətən müharibəsi dövründən başlayaraq, PUA-ların istehsalı və təmiri sahəsində çalışıram. Hazırda "Sinam" şirkətində aparıcı mühəndis kimi fəaliyyətimi davam etdirirəm", - S.Ağadadaşov özü haqqında məlumat verib.
O qeyd edib ki, bu, cənab Prezident tərəfindən təltif edildiyi ikinci mükafatdır:
"İlk mükafatı 2022-ci ildə "Teknofest" yarışmasında birinci yerə layiq görüldüyümüz üçün almışdıq. Ən sevindirici məqam ondan ibarətdir ki, PUA sahəsi Azərbaycan üçün nisbətən yeni olsa da, bu istiqamətdə görülən işlər dövlət tərəfindən yüksək qiymətləndirilir. Bu isə bizi daha böyük layihələrə həvəsləndirir.
Əsas məqsədimiz Azərbaycanda güclü texnoloji mərkəzin formalaşmasına töhfə verməkdir. Necə ki, ABŞ-də Silikon Vadisi mövcuddur, biz də ölkəmizdə bu tip innovasiya ekosistemi yaratmaq istəyirik. Planlarımız PUA istehsalını genişləndirmək və yaxın gələcəkdə Azərbaycanda böyük istehsalat müəssisəsi qurmaqdır".
Mənbə: azedu
