Ölkəmizin Özbəkistan Respublikası ilə fındıqçılıq sahəsində əməkdaşlığını genişləndirmək üçün Qubada görüş keçirilib. Bu haqda ShimalNews 7 aprel tarixində Meyvəçilik və Çayçılıq Elmi-Tədqiqat İnstitutuna istinadən xəbər verir.
Özbəkistanın “Uz Nuts” Qərzəkli Meyvə Bitkiləri İstehsalçıları və İxracatçıları Assosiasiyasının sədr müavini İlyos Haydarovla qarşılıqlı əməkdaşlığın qurulması yolları müzakirə olunub.
Meyvəçilik və Çayçılıq Elmi-Tədqiqat İnstitutunun direktoru İlham Qaraqurbanlı qonağa Azərbaycanda fındıqçılığın inkişaf etdirilməsi, innovativ üsulla fındıq bağlarının salınması və institutun fındıqçılıq sahəsində gördüyü işlər barədə məlumat verib.
İ.Haydarov Özbəkistanda fındıqçılıq sahəsində çatışmazlıqlardan danışıb. Onların həlli üçün ikitərəfli əlaqələrin daha da genişləndirilməsini təklif edib.
Görüşdən sonra qonağın yeni superintensiv texnologiya əsasında salınan fındıq bağı ilə tanışlığı olub.
