Elm və təhsil nazirinin müavini Firudin Qurbanov Quba şəhərinə təşrif buyurub. Səfər çərçivəsində bir sıra görüşlər keçirilib, təhsil müəssisələrinə baxış olub və vətəndaş qəbulu təşkil edilib.
Shimal.News xəbər verir ki, oktyabrın 6-da F.Qurbanov Tələt Mikayılov adına 5 nömrəli tam orta ümumtəhsil məktəbində olub, pedaqoji kollektiv və şagirdlərlə görüşüb. Nazir müavini tədris prosesi ilə tanış olub, dərsləri izləyib və müəllim-şagird heyəti ilə səmimi söhbətlər aparıb.
Səfər proqramı çərçivəsində Firudin Qurbanov Quba rayon Uşaq-Gənclər İnkişaf Mərkəzində də olub. O, mərkəzin fəaliyyəti, yaradılan şərait və uşaqların inkişafı üçün formalaşdırılan imkanlarla maraqlanıb.
Səfərin sonunda vətəndaşların qəbulu keçirilib. Onların müraciətləri əsasən məşğulluq və digər məsələlərlə bağlı olub.
