Şimal bölgəsində ilk avtomobil sürən qadınlardan biri əvvəlcə “Zil”, sonra avtobus sürücüsü olub. Bu barədə ShimalNews 2 fevral tarixində Azərtac-a istinadən məlumat verir.
68 yaşlı Nuriyyə Abdullayeva Quba rayonunun 2-ci Nügədi kəndində yaşayır:
“Əhməd haradadır?” filmindəki Nərgiz xalanın yük maşını sürməyini görəndən sonra qərar verdim ki, mən də sürücü olacağam. Valideynlərim məni müxtəlif yollarla fikrimdən döndərməyə çalışsalar da, arzularımın arxasınca getdim. 1975-ci ildə Bakıda sürücülük məktəbinə yazıldım. İki yüz oğlanın arasında bircə qız mən idim. Altı aylıq kursdan sonra imtahandan uğurla keçib sürücülük vəsiqəmi aldım”.
N.Abdullayevanın 20 yaşı olarkən o, sürücülüyə “Zil” markalı yük avtomobili ilə başlayıb:
“Sürücülük vəsiqəmi aldıqdan sonra ilk iş yerim Quba Avtomobil Bazası oldu. “Zil” maşını ilə, əsasən, meyvə-tərəvəz məhsulları, yük daşıyırdım. Sonra təzə “Volqa”da taksi fəaliyyətinə başladım. İndi qadın sürücülər çoxdur. O vaxt isə məni bütün Qubada tanıyırdılar. 3-4 il taksi sürücüsü işlədim. Sonra Riqa (Latviya) şəhərinə gedib, oradan təzə “RAF” markalı mikroavtobus gətirdim. Quba-Nügədi marşrutu üzrə sərnişin daşıyırdım. Bir müddət sonra “RAF”-ı “QAZel”lə dəyişdim. İndi özüm sahibkaram. Hazırda Quba-Nügədi marşrutu üzrə 4 avtobusumuz fəaliyyət göstərir. Hansısa sürücümüzü əvəz etmək lazım gələrsə, özüm sükan arxasına keçirəm”.
Sürücü olmaqla yanaşı, sahibkar xanım vaxtı ilə toy operatoru kimi də tanınıb. O, düz 15 il məclislərdə operator kimi fəaliyyət göstərib. Amma avtomobil sürmək onun üçün bütün məşğuliyyətlərdən önəmli qalıb.
Nuriyyə xanımın sözlərinə görə, 50 ilə yaxın müddətdə o, qəza törətməyib. Hadisələrin əsas səbəbinin isə yüksək sürətdə olduğunu söyləyir.
[caption id="attachment_35971" align="alignnone" width="640"]
Foto Azərtac[/caption]
View this post on Instagram
