Sumqayıt Apellyasiya Məhkəməsində quldurluq edən Hikmət Yusifovun (soyadı şərtidir) apellyasiya şikayətinə baxılıb.
Pravda.az-ın məlumatına görə, hakim Rəşadət Ağayevin sədrliyi ilə keçirilən prosesdə qərar elan olunub. Qərara əsasən, apellyasiya şikayəti təmin edilməyib.
İttihama görə, hadisə 2023-cü il oktyabrın 2-də saat 19:20 radələrində zərərçəkmiş Nadejda Polkovnilcovanın yaşadığı Xaçmaz rayonu, Nabran kəndi ərazisində qeydə alınıb.
Belə ki, Hikmət Yusifov Nabranda yerləşən “Maral göl” istirahət mərkəzindən şərq istiqamətində 500 metr aralı məsafədə yerləşən evin həyətinə hasardan keçib. Sonradan tanınmamaq üçün əynində olan gödəkçənin papağını burnunun üstünədək çəkərək həyətdə olan zərərçəkmiş şəxsi arxadan tutub, zor tətbiq edib, birlikdə evə qanunsuz girib. Sonra Hikmət qadını qəsdən irəli itələyərək yıxıb. O, dəmir parçası ilə zərərçəkmişə hədə-qorxu gələrək evdə olan pulun və qızıl-zinət əşyalarının ona verilməsini tələb edib. Nadejda da pul və qızıl-zinət əşyalarını saxladığı yeri göstərib. Sonra Hikmət yataq otağından ümumi dəyəri 65 min 135 manat məbləğində qızıl-zinət əşyalarını və qadına məxsus telefonu quldurluq yolu ilə ələ keçirib.
Sumqayıt Ağır Cinayətlər Məhkəməsinin hökmü ilə o, 12 il müddətə azadlıqdan məhrum edilib.
Qeyd edək ki, Hikmət Yusifov məhkəmədə elan edilən ittiham üzrə özünü təqsirli bilməyərək ifadəsində göstərib ki, 2011-ci ildə Rusiyada iki dəfə narkotik vasitədən istifadə etdiyinə görə tutulub və 11 il 6 ay müddətə azadlıqdan məhrum edilib. Sonra Qaradağ rayonu, Lökbatan qəsəbəsinə gələrək anası ilə yaşayıb. Daha sonra evi satıb, pulu qardaşı ilə bölüşdürüb. Yay aylarında Nabranda istirahət edib. Zərərçəkmiş şəxslə qonşu olub.
