Nabranda dənizkənarı ərazilərin bəzi istirahətə gələn şəxslər tərəfindən zibil poliqonuna çevrilməsi sakinlərin qınaq obyektinə tuş gəlib.
Vətəndaşlar Shimal.News-a vəziyyətin acınacaqlı olduğunu bildirib və mövzunun işıqlandırmasını israrla xahiş edib, istəklərinə nail olublar.
Xatırladaq ki, sahilə istirahət üçün üz tutanların arasında tullantılarını dəniz kənarında atıb gedənlər olub.
Artıq ərazi təmizlənib, Daxili İşlər Nazirliyinin Post Patrul Xidmətinin əməkdaşları nəzarət tədbirləri həyata keçirirlər.
Sakinlər abadlıq yaradılmasına və əməyi keçən hər bir kəsə təşəkkürlərini bildiriblər.
Məlumat üçün bildirək ki, məişət tullantılarının kənar yerlərə atılmasına görə fiziki şəxslər üç yüz manat məbləğində, vəzifəli şəxslər min manat məbləğində, hüquqi şəxslər dörd min manat məbləğində cərimə edilə bilər.
Nəzərdə tutulmuş xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə fiziki şəxslər min manat məbləğində, vəzifəli şəxslər min beş yüz manatdan iki min manatadək məbləğdə cərimə edilir, yaxud işin hallarına görə, xətanı törədənin şəxsiyyəti nəzərə alınmaqla, altmış saatdan yüz saatadək ictimai işlər tətbiq olunur, hüquqi şəxslər beş min manatdan yeddi min manatadək məbləğdə cərimə edilə bilər.
