Nabranda dənizkənarı ərazilər zibil poliqonuna çevrilib.
Bu barədə Shimal.News-a danışan sakinlərin sözlərinə görə, sahilə üz tutan bəzi şəxslər tullantılarını dəniz kənarında atıb gedərək ərazidə ekoloji fəlakət yaradırlar.
“Təkcə ödənişli sahil zolaqları təmiz saxlanılır, digər pulsuz ərazilərdə isə tullantılar yığılır. Bu isə həm mənzərəni korlayır, həm də dənizi çirkləndirib antisanitar vəziyyət yaradır. Bəzi şəxslər bu halı zibil qutularının olmaması ilə əlaqələndirilər. Əslində isə bu sadəcə bəhanədir. Biz də buraya istirahətə gəlirik, öz tullantılarımızı paketə yığaraq aparırıq. Hətta bəzən imkan daxilində məsuliyyətsiz vətəndaşların burada saxladıqları zibillərdən də daşıyırıq ki, az da olsa təmizlik yaransın”,- deyə sakinlərdən biri söyləyib.
Məlumat üçün bildirək ki, məişət tullantılarının kənar yerlərə atılmasına görə fiziki şəxslər üç yüz manat məbləğində, vəzifəli şəxslər min manat məbləğində, hüquqi şəxslər dörd min manat məbləğində cərimə edilə bilər.
Nəzərdə tutulmuş xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə fiziki şəxslər min manat məbləğində, vəzifəli şəxslər min beş yüz manatdan iki min manatadək məbləğdə cərimə edilir, yaxud işin hallarına görə, xətanı törədənin şəxsiyyəti nəzərə alınmaqla, altmış saatdan yüz saatadək ictimai işlər tətbiq olunur, hüquqi şəxslər beş min manatdan yeddi min manatadək məbləğdə cərimə edilə bilər.
