Gələn həftə Bakıda keçiriləcək COP29 beynəlxalq konfransı ilə əlaqədar dünyanın müxtəlif ölkələrindən olan yəhudi icmalarının tanınmış ravvinləri də paytaxtımızda səfərdədir.
Shimal.News xəbər verir ki, Avropa Ravvinləri Konfransının vitse-prezidenti və Fransanın baş ravvininin xüsusi müşaviri ravvin Moşe Levin, həmçinin Yunanıstandakı Saloniki ravvinləri və Konfransın Daimi Komitəsinin sədr müavini, ravvin Yitzhak Dayan, eləcə də digər avropalı ravvinlər Quba rayonunun Qırmızı Qəsəbəsini gəzib, yerli sinaqoqlarda, Dağ Yəhudilərinin İrsi Muzeyində olublar.
Ravvin Moşe Levin səfərlə bağlı həyəcanını dilə gətirib: “Qırmızı Qəsəbəyə səfər etmək məni çox təsirləndirdi, sanki tarixin səhifələrində addımlayırmış kimi hiss etdim. Dağ yəhudilərinin ənənələrini davam etdirən yerli yəhudilərin irsinə şahid olmaq inanılmaz dərəcədə möhtəşəm idi”.
Azərbaycan Gürcü - Sefarad yəhudiləri dini icmasının sədri, ravvin Zamir İsayev isə bildirib ki, səfər Azərbaycan ilə İsrail arasında və onların xalqları arasında sıx əlaqələri tərənnüm edir.
Qeyd edək ki, Azərbaycanda yəhudi icması hazırda 20 min nəfərə yaxındır.
