Xınalıqdan Şirvan zonasına qışlağa gedən maldarlar geri qayıdıblar. Bu barədə ShimalNews 26 yanvar tarixində Bizim.Media-ya istinadən məlumat verir.
"40 nəfər maldarlıqla məşğul olan sakin Hacıqabul-Şirvan zonasında qışlaqlara getməyib. Buna həmin rayonlarda da quraqlığın hökm sürməsi səbəb olub", - deyə Quba IH başçısının Xınalıq İƏD üzrə nümayəndəsi Nəsimi Məmmədov bildirib.
Onun sözlərinə görə, hazırda Xınalığın özündə də quraq hava müşahidə edilir. Bu, torpağı cadar-cadar edib, bulaqlar isə donub. İçməli su qıtlığı yaranmaması üçün tədbirlər görülüb.
Xınalıqda suvarılan torpaq sahəsi cəmi 5-10 hektardır. Əsas sahələr dəmyə torpaqlardır. Yaz aylarında quraqlıq davam edərsə, maldarlıqla və əkinçiliklə məşğul olan sakinlərə əlavə çətinlik yarana bilər.
