Hazırda Məhəmməd özünü yaxşı hiss edir. Müalicəsi davam edir, üzündəki şişlər yatıb. Həkimlərdən çox razıyıq, bir an olsun uşağı nəzarətsiz buraxmırlar.
Bu fikirləri Shimal.News-a açıqlamasında bir müddət öncə it hücumuna məruz qalan Quba rayonu Küsnətqazma kənd sakini 5 yaşlı Məhəmməd Məhəmmədovun anası Natəvan Məhəmmədova bildirib.
N.Məhəmmədova qeyd edib ki, oğlunu dişləyən it hələ də kənddədir və sərbəst formada gəzir: “Aldığımız məlumatlara görə, məlum hadisədən sonra həmin it bir neçə nəfərə də hücum edib. Çox şükür ki, onlara heç nə olmayıb. Düzdür bilirəm ki, əslində 40 gün müddətində iti zərərsizləşdirmək olmaz çünki uşaq sağalmalıdır. Lakin aidiyyəti qurumlardan xahiş edirəm, o itlər nəzarət altında saxlanılsın. Artıq günlərdir ki, kənd uşaqları məktəbə getməyə qorxurlar. Uşaqlar təhsildən yayınırlar”.
