Quba şəhərində “Kreativ Gənclər II” düşərgəsi təşkil olunub.
Shimal.News xəbər verir ki, düşərgə Gənclər və İdman Nazirliyi ilə Azərbaycan Dövlət Mədəniyyət və İncəsənət Universitetinin (ADMİU) birgə təşkilatçılığı ilə keçirilib.
Tədbirdə müxtəlif ali və orta ixtisas təhsil müəssisələrindən ümumilikdə 120 nəfər tələbə iştirak edib.
Düşərgə çərçivəsində təlimlər, konsert proqramları və yaradıcı fəaliyyətlər təqdim olunub.
Tədbirin əsas məqsədi tələbələr arasında qarşılıqlı kommunikasiya mühitinin yaradılması, istedadlı gənclərin sosial və bədii fəallığının artırılması, onların peşəkar bacarıqlarının inkişafı, estetik zövqün formalaşdırılması və yaradıcılıq maraqlarının genişləndirilməsidir.
Tədbirə Azərbaycan Dövlət Mədəniyyət və İncəsənət Universiteti, ADMİU nəzdində Humanitar Kollec, Azərbaycan Dövlət Xoreoqrafiya Akademiyası, Bakı Musiqi Akademiyası və digər ali təhsil müəssisələri ilə yanaşı, Azərbaycan Milli Konservatoriyasının tələbələri də qatılıblar.
Azərbaycan Milli Konservatoriyasının tələbələri – Elmir Səfərli (xanəndə, III kurs), Əli Muradov (instrumental ifaçılıq, IV kurs), Fateh İsgəndər (instrumental ifaçılıq, II kurs), Altun Süleymanov (milli vokal, III kurs), Saniyət Nağıyeva (musiqi müəllimliyi, III kurs) və Fərid Məmmədli (pop-caz, III kurs) bir-birindən maraqlı təlimlərdə iştirak etməklə yanaşı musiqi nömrələri ilə çıxış edərək iştirakçılara yaddaqalan ifalar təqdim ediblər. Onlar, həmçinin müxtəlif layihələrdə fəal iştirak edərək sertifikatlara layiq görülüblər.
