Qusar rayonunda sahibkarlarla görüş keçirilib.
Shimal.News xəbər verir ki, görüşdə kənd təsərrüfatı, sənaye, turizm, pərakəndə satış, ictimai iaşə sahələrində fəaliyyət göstərən 100-ə yaxın sahibkar iştirak edib.
Diqqətə çatdırılıb ki, biznesə başlamaq və inkişaf etdirmək üçün dövlətin dəstək alətləri, bu sahədə yeniliklər, rayonun biznes və investisiya potensialı barədə ətraflı məlumat üçün sahibkarlar KOB dostu ofislərinə müraciət edə bilərlər.
Tədbir çərçivəsində sahibkarlarla kənd təsərrüfatı texnikasının təmiri məntəqələrinin yaradılması, subsidiyalar, torpağın təyinatının dəyişdirilməsi, ixrac, tədarük məntəqələri və satış, kommunal xidmətlərə qoşulma, lizinq və s. məsələlərlə bağlı müzakirələr aparılıb, biznes subyektlərinin sualları cavablandırılıb.
