Məhəmməd hazırda quduzluğa qarşı vaksinasiya olunur.
Bunu Shimal.News-a açıqlamasında dünən it hücumuna məruz qalan Quba rayonu Küsnətqazma kənd sakini 5 yaşlı Məhəmməd Məhəmmədovun anası Natəvan Məmmədova bildirib.
N.Məhəmmədova qeyd edib ki, onun vəziyyəti normaldır, qızdırması yoxdur: “Həkimlərin sözlərinə görə, oğlumun üzündəki şiş çəkilən kimi cərrahi əməliyyat olunacaq. Hələ ki həkimlər şişkinliyin yatmasını, quduzluğa qarşı müalicənin bitməsini gözləyirlər. Artıq 2 dəfə iynə vurulub. Bundan sonra da 6-7-si vurulmalıdır ki, uşaq sağalsın. Həkimlər bildirirlər ki, uşağı qapan iti müalicə bitənədək zərərsizləşdirmək olmaz”.
N.Məhəmmədova, həmçinin sosial şəbəkələrdə başladılan yardım kampaniyası barəsində də danışıb:
“Sosial şəbəkələrdə paylaşılan kart dayım oğlunun kartıdır və yığılan vəsait mənə çatır. Yardım göstərən hər kəsə təşəkkürümü bildirirəm, minnətdaram”.
