İsmayıllı və Şabran rayonlarında tat folklorunun yaşadılmasına dəstək məqsədilə növbəti tədbirlər keçirilib.
Shimal.News xəbər verir ki, Azərbaycan Respublikasının QHT-lərə Dövlət Dəstəyi Agentliyinin maliyyə dəstəyi ilə "Azəri" Tat Mədəniyyət Mərkəzi İctimai Birliyinin həyata keçirdiyi "Folklorumuzu yaşadaq: tat folklor kollektivlərinə dəstək" layihəsi çərçivəsində Lahıc Xalq Folklor Kollektivi və Şabranın "Xınayaxdı" Xalq Folklor Kollektivinin üzvlərinə milli geyim dəstləri təqdim edilib.
Layihə çərçivəsində ümumilikdə 24 folklor kollektivinin üzvü yeni səhnə geyimləri ilə təmin olunub. Həmçinin tat xalq yaradıcılığı nümunələrini özündə əks etdirən "Tat folklorundan seçmələr" adlı kitabın təqdimatı keçirilib.
Tədbirlərdə çıxış edənlər layihənin tat xalqının zəngin folklor irsinin qorunması, gələcək nəsillərə ötürülməsi və folklor kollektivlərinin fəaliyyətinin dəstəklənməsi baxımından mühüm əhəmiyyət daşıdığını vurğulayıblar.
Təqdimat mərasimlərində Lahıc Xalq Folklor Kollektivi və Şabranın "Xınayaxdı" folklor kollektivi milli mahnı və rəqslərdən ibarət proqramla çıxış edərək tamaşaçılara zəngin folklor nümunələri təqdim ediblər.
Sonda layihənin həyata keçirilməsində fəallıq göstərən şəxslərə təşəkkürnamələr təqdim olunub.
