Qubada baş vermiş dələduzluq və mənimsəmə işi üzrə təqsirləndirilən Ayven Şamuradovun Sumqayıt Apellyasiya Məhkəməsinə verdiyi şikayətə baxılıb və proses başa çatıb.
Pravda.az-ın məlumatına görə, hakim Elman Əhmədovun sədrliyi ilə keçirilən iclasda çıxarılan qərara əsasən, apellyasiya şikayəti təmin edilməyib.
İttihama görə, hadisə rayonun Quxur-oba kəndində qeydə alınıb. Kənd sakini Ayven Şamuradov Rusiyadan qonaq gələn xalası oğlu Həmdulla Beydulloviçi aldadaraq, onun adına fermer təsərrüfatı yaratmaq vədi ilə ümumilikdə 780 min manat pul alıb. Lakin o, həmin vəsaitlə təsərrüfat qurub, bağ sahələri salsa da, bütün əmlakı xalası oğlunun deyil, öz adına rəsmiləşdirib.
Zərərçəkmişin müraciətindən sonra Ayven Şamuradov barəsində cinayət işi açılıb və o, istintaqa cəlb edilib. Sumqayıt Ağır Cinayətlər Məhkəməsinin hökmü ilə Ayven Şamuradov 12 il 6 ay müddətinə azadlıqdan məhrum edilib.
