Qubada yetkinlik yaşına çatmayan oğlan iki dost tərəfindən zorlanıb.
Shimal.News-un əldə etdiyi məlumata görə, hadisənin istintaqı Sumqayıt Ağır Cinayətlər Məhkəməsində keçirilib.
Belə ki, təqsirləndirilən Novruz Nəcəfov (ad şərtidir) 2009-cu ildə Quba şəhərində anadan olub. O, tanışı, təqsirləndirilən Əli Vəliyev (ad şərtidir) ilə əlbir olub, 14 yaşına çatmayan Nicat Qafarovu (ad şərtidir) Qudyalçay çayının sağ sahilində yerləşən “bulaq" adlanan əraziyə aparıb. Orada oğlanın razılığı olmadan, zor tətbiq edərək məcburi cinsi münasibətdə olublar.
Novruz Nəcəfov və Əli Vəliyev Azərbaycan Respublikası CM-nin 150.3.3-cü (seksual xarakterli zorakılıq hərəkətləri) maddələri ilə təqsirləndirilib.
Məhkəmədə təqsirləndirilən şəxs qismində dindirilən Novruz Nəcəfov ona qarşı irəli sürülən ittiham üzrə özünü təqsirli bilməyib:
“Hadisə günü Əlinin yaşadığı evin qarşısına getdim. Çünki onunla oyun zalına gedib vaxt keçirməyi planlaşdırmışdıq. Bu zaman Nicat da çayın kənarında idi. Biz gedəndə o, arxamızca gəldi. Geriyə qayıdıb “arxamızca gəlmə” deyəndə nalayiq ifadələr işlətməyə başladı. İşlətdiyi sözlərə görə mən təpik, Əli də başından sillə vurdu. Sonra oyun zalına getdik. Nicatın dediklərinin hamısı yalandır”.
Məhkəmə istintaqı zamanı digər təqsirləndirilən Əli Vəliyev ifadə verərək özünü təqsirli bilməyib:
“Hadisə günü günorta Nicat bizə gəlib qardaşımı çağırdı. Çölə çıxıb qardaşımın evdə olmadığını dedim. Biz də Novruzla oyun zalına getməyi planlamışdıq. O, məni çölə çağıranda Nicatın da yanında olduğunu gördüm. Oyun zalına gedəndə o da arxamızca gəlməyə başladı. Nicata bizlə gəlməməsini deyəndə söyüş söyməyə başladı. Sillə və təpik vuraraq onu orada qoyub oyun zalına getdik. Nə mən, nə də Novruz ona qarşı seksual hərəkətlər etməmişik”.
Daha sonra qanuni nümayəndə və psixoloqun iştirakı ilə zərərçəkmiş Nicat Qafarov ifadə verib:
“Onlarla eyni məktəbdə oxuyuruq. Hadisə günü Novruz və Əli məni çay kənarına döyərək aparıblar. Mənə qarşı seksual hərəkətlər etməyə birinci Novruz başladı. Qaçmağa cəhd etsəm də, alınmadı. Hər ikisi növbə ilə məni zorladılar. Heç kimə şər atmıram”.
Məhkəmə tədqiq edilmiş sübutlara məcmu halda hüquqi qiymət verərək Novruz Nəcəfovu və Əli Vəliyevi cinayət üzrə təqsirli bilib.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Novruz Nəcəfov və Əli Vəliyev hər biri 10 il müddətinə azadlıqdan məhrum edilib. Yaşları az olduğuna görə cəzanı ümumi rejimli tərbiyə müəssisəsində çəkəcəklər.
Fidan İlqar
