Zaqatala rayonunda qumar oyunlarında iştirak edən 27 yaşlı gənc inzibati məsuliyyətə cəlb olunub.
Rayon sakini, 1999-cu il təvəllüdlü Telman Vəliyev (ad-soyad şərti verilib - red.) "Mostbet" platformasında özünə və anasına məxsus telefon nömrələri ilə qeydiyyatdan keçib.
O, yaratdığı profillər vasitəsilə qumar oynayıb, qazandığı qanunsuz vəsaiti isə mobil nömrəsi ilə qeydiyyatdan keçdiyi "M10" tətbiqi və özünə məxsus bank kartı vasitəsilə çıxarıb.
Telman Vəliyev barəsində İnzibati Xətalar Məcəlləsinin 525-ci maddəsi (qumar oyunlarında iştirak etmə) ilə inzibati xəta haqqında protokol tərtib edilib.
Məlumata görə, o, "Mostbet" saytındakı hesabdan 100 manat qazanc çıxarıb.
Araşdırmalar zamanı onun daha əvvəl bu yolla 15 min manat qazanc əldə etdiyi iddia edilsə də, bu məbləğ sübuta yetirilməyib.
Zaqatala Rayon Məhkəməsinin qərarı ilə Telman Vəliyev 3 min manat cərimə edilib, qazanc kimi əldə etdiyi 100 manat isə müsadirə olunub.
Mənbə: Teleqraf
