Qubanın Gədikqışlaq kəndində elektrik dirəkləri köhnəlib, çürüsə də, problemin həllinə cavabdeh olan qurumlar hələ də dimdik ayaqüstdədirlər.
Shimal.News olaraq ötən il bu mövzunu işıqlandırmışdıq, indi isə növbəti “ilin hesabatını” veririk: dəyişən yeganə şey vədlərin sayıdır.
Sakinlərin sözlərinə görə, külək əsəndə dirəklər zəif budaqlardan daha çox titrəyir. Dəfələrlə aidiyyəti qurumlara müraciət olunsa da, nəticə yoxdur.
Məsul qurumlar isə “tezliklə həll olunacaq” deyə cavab verib dirəklərdən daha möhkəm dayanıblar. Görünür, bu qurumlar problemi həll etməkdənsə, xalqın səbrini sınağa çəkməyi daha məqsədəuyğun bilirlər. Axı, illərdir çürüyən dirəklər nə qədər dözüb, dözə bilər?!
Gədikqışlaqda elektrik xətləri ilə bağlı problemlər yeni deyil, amma onların düzəlməsi o qədər gecikir ki, kənd camaatı artıq onları kəndin tarixi abidələri kimi qəbul edir. Ola bilsin ki, bir müddət sonra kənd ərazisi “Qədim elektrik dirəkləri” adı altında turistik zona kimi təqdim olunsun.
Hər halda, ümid edirik ki, problem həllini tapar, yoxsa bir gün külək bu dirəkləri də, cavabdeh qurumların boş vədlərini də özü ilə aparacaq.
Biz isə yeni bir xəbər başlığı yazmaq məcburiyyətində qalmaq istəmirik: "Gədikqışlaqda çürüyən dirəklərinin yaratdığı FACİƏ...".
