Əmir Kərimov Vətən müharibəsi başlayanda cəmi beş ay idi hərbi xidmətdə idi. Xaçmazlı döyüşçü Füzuli, Cəbrayıl, Xocavənd, eləcə də Suqovuşanın işğaldan azad edilməsi əməliyyatlarında fədakarlıqla iştirak edib. Döyüşlərin birində ağır güllə yarası alan Əmir göstərdiyi şücaətlərə görə dörd medalla təltif olunub.
Azərtac-ın məlumatına görə, Əmir Şahin oğlu Kərimov 2002-ci il martın 25-də Xaçmaz şəhərində anadan olub. 2008-2019-cu illərdə Əzizəddin Tahirov adına Köhnə Xaçmaz kənd tam orta məktəbində təhsil alıb.
2020-ci il mayın 5-də müddətli həqiqi hərbi xidmətə başlayıb. Sentyabrın 27-dən etibarən torpaqlarımızın işğaldan azad edilməsi əməliyyatlarında qəhrəmanlıqla savaşıb. Xocavənd və Füzuli rayonları istiqamətində gedən döyüşlərdə atıcı, qumbaraatan köməkçisi kimi vuruşub.
Oktyabrın 7-də Füzulinin Qaraxanbəyli kəndinin düşməndən azad edilməsi uğrunda gedən döyüşlərdə ağır yaralanıb.
“Təlimlərdə iştirak etmişdik. Torpaqlarımızı işğaldan azad etməyə hazır idik. Əvvəlcə Xocavənd rayonunda olduq. Sonra bizim tağım Füzulidə döyüşlərdə iştirak etdi. Qaraxanbəyli kəndinin azad olunması uğrunda döyüşlərdə komandirimiz şəhid oldu. Mən isə qəlpə və güllə yarası aldım. Bir müddət yaralandığım ərazidən çıxmaq mümkün olmadı. Bir gün sonra Füzulinin Əhmədbəyli kəndinə aparıldım. Orada əməliyyat olundum. Sonra da helikopterlə Bakıya gətirildim. Uzun müddət müalicə aldım. Qəhrəman həkimlərimizin sayəsində bu gün ayaq üstə yeriyə bilirəm. Qələbə xəbərini də hospitalda eşitdim. Çox sevindik. Şəhidlərimizin qanı yerdə qalmadı”, - deyə Əmir Kərimov bildirib.
Əmir 2022-ci ilin yanvarında ordu sıralarından tərxis olunub. İkinci qrup əlildir.
“Füzuli döyüşləri çox ağır oldu. Hər yerdə illərlə möhkəmləndirilmiş beton sədlərə rast gəlirdik. Yüz metr irəliləyirdik qarşımıza yenidən növbəti düşmən səddi çıxırdı. Şiddətli döyüşlərdə ev yadıma düşmürdü. Cəbhədə ailə başçısı komandir, ailənin üzvləri isə döyüş yoldaşların olur. Şəhid döyüş yoldaşlarıma görə çox üzülürəm. Tovuzdan Fərzəliyev Samiq var idi. Yeni evlənmişdi. Onun ailəsi və gələcək karyerası ilə bağlı böyük arzuları var idi. Şəhid olduqdan sonra övladı da dünyaya gəldi. Müharibədən sonra da zabit kimi Vətənə xidmət etmək istəyirdi. Əminəm ki, indi Samiq kimi qəhrəmanların ruhu şaddır”,- deyə Əmir Kərimov söyləyib.
Silahlı Qüvvələrin Ali Baş Komandanı, Prezident İlham Əliyevin müvafiq sərəncamlarına əsasən Əmir Kərimov döyüşlərdə göstərdiyi şücaətlərə görə "Cəsur döyüşçü", "Füzulinin azad olunmasına görə", "Xocavəndin azad olunmasına görə" və "Vətən müharibəsi iştirakçısı" medallarına layiq görülüb.
