Quba rayonunun Alekseyevka kəndində məktəb yolundakı quru ağaclar təhlükə yaradır.
Shimal.News redaksiyasına Quba rayonunun Alekseyevka kəndindən narahatedici şikayət daxil olub.
Məlumata görə, kənd məktəbinə gedən yolda olan quru və köhnə ağaclar piyadalar və nəqliyyat vasitələri üçün ciddi təhlükə mənbəyinə çevrilib.
Sakinlərin bildirdiyinə görə, küləkli hava şəraitində bu ağacların budaqları tez-tez qırılaraq yola düşür. Təxminən bir həftə əvvəl həmin ağaclardan birinin böyük budağı qırılaraq internet kabellərinin üzərinə düşüb. Digər kökündən qırılan ağac isə yalnız qonşu ağaca söykəndiyi üçün hələ də aşmayıb. Bu isə istənilən an faciəyə səbəb ola bilər.
Ən narahatedici məqam odur ki, kabellərin üzərinə düşən ağac budağının yaratdığı problem həftələrdir həllini tapmır. Şikayətçi bildirir ki, bəlkə də müvafiq qurumun bu barədə heç məlumatı da yoxdur.
Məktəb yolunda yerləşən bu ağacların uşaqlar üçün yaratdığı təhlükə sakinləri xüsusilə narahat edir. Belə ki, ağacların yıxılma ehtimalı hər gün məktəbə gedib-gələn şagirdlərin həyatını təhlükə altında qoyur.
