Quba rayonunun Qrız kəndində yerləşən qədim Əbu Müslim məscidi laqeyd münasibətə görə, məhv olmaq təhlükəsi ilə üz-üzədir.
Shimal.News xəbər verir ki, yerli sakinlərin narahatlığına səbəb olan tarixi abidə istifadəyə tamamilə yararsız vəziyyətdədir.
Əbu Müslim məscidi bölgənin ən qədim dini-memarlıq abidələrindən biridir. Uzun illər ərzində təbiət amilləri və baxımsızlıq səbəbindən məscidin strukturu ciddi şəkildə zədələnib, lakin buna baxmayaraq, bəzi tarixi elementlər hələ də qorunub saxlanılıb.
Məscidin qalıqları arasında divarları, mehrabı, kitabələri və xüsusi əhəmiyyət daşıyan, üzərində yazılar və müxtəlif formalı naxışlarla bəzədilmiş qədim ağac sütunlar dövrümüzə qədər gəlib çatıb. Bu elementlər yerli əhalinin dini və mədəni irsinin mühüm nümunələri hesab olunur.
Sakinlər tarixi məscidin xilas edilməsini və bərpasını istəyirlər.
Bu abidənin qorunması təkcə dini dəyər kimi deyil, həm də bölgənin mədəni irsinin vacib bir hissəsi kimi əhəmiyyət daşıyır.
