Dövlət İmtahan Mərkəzinin Xaçmaz regional bölməsi tərəfindən “Zal nəzarətçisi” sertifikatının verilməsi üçün təlim keçirilib. Bu barədə ShimalNews 30 yanvar tarixində adıçəkilən mərkəzə istinadən xəbər verir.
Sayca 2-ci mərhələ olan təlim regional bölmənin inzibati binasında təşkil edilib. Bura seçilmiş 40 namizəd cəlb olunub.
Təlimçi Qafil Dəmirov tərəfindən aparılan seminarlarda Dövlət İmtahan Mərkəzi haqqında ümumi məlumat, imtahanlar, onların təşkili və idarə edilməsi, imtahanlara cəlb olunan məsul şəxslərin seçimi, təyinatı, qiymətləndirilməsi, imtahanların texnologiyası, auditoriyanın idarə edilməsi, zal nəzarətçilərinin və digər şəxslərin vəzifələri və funksiyaları haqqında nəzəri məlumatlar verilmiş və diskussiya aparılmışdır.
Daha sonra namizədlər yekun test imtahanında iştirak edəcəklər.
