Xaçmaz rayonu Rövşən İsrafilov adına Qobuqıraq kənd ümumi orta məktəbinin binası qəzalı vəziyyətdədir.
Məsələ ilə bağlı Shimal.News-a danışan yerli sakinlərin sözlərinə görə, 1941 ci ildə bünövrəsi qoyulan məktəb sonuncu dəfə 1988 ci ildə taxta materiallarla qismən yenilənib. Uzun illərdir qəzalı vəziyyətdə olan məktəb 130 şagird yerlik nəzərdə tutulsa da, hazırda təhsil ocağında 375 nəfər məktəbli oxuyur.
“Məktəbin qəzalı vəziyyətdə olması ilə yanaşı elektrik xətləri də, bərbad vəziyyətdədir. Dəfələrlə məktəbdə çalışan müəllimlər öz şəxsi büdcələri hesabına müəyyən çatışmazlıqları aradan qaldırıblar.
Hər il yeni məktəb binasının tikintisi ilə bağlı söz verilsə də, heç bir nəticə olmayıb. Görünən odur ki, bu il də kənd məktəbinin tikintisi baş tutmayacaq”,- deyə sakinlər bildiriblər.
Eyni zamanda valideynlər uşaqlarının təhlükəsizliyindən narahatdırlar. Valideynlərin iddialarına görə, ötən ayların birində sinif otağının döşəməsi çöküb. Nəticədə bir neçə şagird ayağından yüngül xəsarətlər alıb. Həmçinin güclü külək nəticəsində məktəbin dam örtüyü uçub. Məktəb hər an çökə bilər.
Məktəbin vəziyyəti ilə bağlı Shimal.News-un sorğusuna cavab verən Məktəbəqədər və Ümumi Təhsil üzrə Dövlət Agentliyinin İctimaiyyətlə əlaqələr sektorunun məsləhətçisi Fəridə Sahib bildirib ki, məktəbinin mövcud vəziyyətindən xəbərdardılar.
“Məktəbə baxış keçirilib, zəruri sənədləşdirmə işləri aparılıb və aidiyyəti qurumlara müraciət olunub. Qeyd edirik ki, təhsil müəssisələrinin tikintisi və təmiri növbəlilik və prioritetlik prinsiplərinə uyğun şəkildə həyata keçirilir”, - deyə o cavablayıb.
