Qusar rayonunda payızlıq taxıl səpini uğurla başa çatıb.
Shimal.News xəbər verir ki, bunu Qusar Dövlət Aqrar İnkişaf Mərkəzinin direktoru Rauf Minhacov deyib.
O bildirib ki, 2025-ci ilin məhsulu üçün rayonda 19 min 710 hektar sahəyə payızlıq taxıl səpilib. Bunun 10 min 650 hektarı buğda, 9060 hektarı isə arpa sahələridir.
“Təəssüf hissi ilə qeyd etmək lazımdır ki, Qusar rayonunda son illər bağçılıq sahəsinin sürətli inkişafı taxılçılıq sahəsinin xeyli geriləməsinə səbəb olub. Son illər rayon ərazisində kütləvi şəkildə salınan intensiv və superintensiv bağlar onu göstərir ki, fermerlər bu gəlirli sahəyə diqqəti artırıblar. Nümunə olaraq qeyd etmək olar ki, 2016-cı ildə rayonda 28 min 30 hektar payızlıq əkin sahəsi mövcud idisə, 2024-cü ilin məhsulu üçün rayonda cəmi 23 min 121 hektar taxıl əkini sahəsi olub” , - deyə direktor vurğulayıb.
