Xəbər verdiyimiz kimi, noyabrın 4-də paytaxtın Bəşir Səfəroğlu küçəsində - "Efkar Meyhane" adlı məkanın yaxınlığında 2006-cı il təvəllüdlü Yasin İbadov çoxsaylı bıçaq xəsarətləri alaraq həyatını itirib. Hadisəni törətməkdə şübhəli bilinən mərhumun əmisi hüquq-mühafizə orqanları tərəfindən saxlanılıb.
Bu gün Bakı Ağır Cinayətlər Məhkəməsində hakim Elmin Rüstəmovun sədrliyi ilə Bakının mərkəzində qardaşı oğlunu qətlə yetirməkdə təqsirləndirilən Babək İbadovun cinayət işi üzrə məhkəmə prosesi keçirilib.
Məhkəmədə təqsirləndirilən şəxs ittiham aktı ilə tanış olmadığını bildirib. Bu səbəbdən baxış iclası 26 yanvar tarixinə təyin edilib.
Onu da xatırladaq ki, cinsi azlıq nümayəndəsi olan Yasin İbadov Şamaxı rayonundandır. O, uzun müddət Türkiyədə yaşayıb.
