Quba rayonu Qrız kənd ümumi orta ümumtəhsil məktəbində işləyən müəllim gördüyü işdən danışıb.
Shimal.News məlumat verir ki, Yardımlıdan olan 28 yaşlı müəllim Nurlan Muradov jurnalist Günel Habilqızı Feyzullayeva ilə həmsöhbət olub.
“Bu ixtisası, yəni tarix müəllimliyi peşəsini mənə atam seçib. Universitetə kodlaşdırmanı da o edib. Amma peşman deyiləm. Mən bu gün fikirləşirəm ki, bu qədər problemin içində müəllim olmağım yaxşıdır. Çünki müəllimliyin sadəcə hansısa peşə ya sənət olmadığını görürəm. Yəni cəmiyyətdə də müəllim olursan, küçədə də müəllim olursan, hər yerdə müəllim olursan”, - deyə gənc müəllim fikirlərini səsləndirib.
Nurlan Muradov onu da bildirib ki, “ən şanslı insan məktəb vaxtı qarşısına yaxşı müəllim çıxan insandır” deyimi ilə razıdır. Müəllim şagirdi yönləndirərək həqiqətən də onun həyatında çox şeyi dəyişdirir.
Tədrisə gəldikdə müəllim Qrızda şagirdlərin dərsə marağı olduğu qeyd edib:
“Mənim şagirdim olimpiadanın yarımfinal mərhələsindədir. Baxmayaraq ki, hələ 8-ci sinifdə oxuyur. Şagirdlər yaxşıdır, istedadlı uşaqlar var. Yaxşı olacaq gələcəkləri, özlərinə də demişəm”.
