Cari ilin yanvar-sentyabr aylarında 4 milyon 482 384 vətəndaş ölkə ərazisinə turizm səfəri həyata keçirib ki, bu da ötən ilin eyni dövrü ilə müqayisədə 11,5% və ya 461 min 789 nəfər çox olub.

MTM-in Dövlət Statistika Komitəsinin açıqladığı rəsmi rəqəmlər əsasında apardığı təhlilə görə, bu şəxslər ümumilikdə ilk 9 ayda 18 milyon 541 min 185 turizm məqsədli səfər həyata keçiriblər ki, bu da öz növbəsində ötən ilin eyni dövrü ilə müqayisədə 11,3 % və ya 1 milyon 887 min 704 səfər çox deməkdir.

Məlumat üçün bildirək ki, 2024-cü ilin ilk 9 ayında ölkə daxilində səfər etmiş şəxslərin hər biri bu müddətdə ortalama olaraq 4,1 dəfə səfər edib. Bu göstərici 2023-cü ilin həmin dövrünün nəticəsi ilə eynidir.

Cari ilin ilk 9 ayında turizm məqsədilə həyata keçirilən səfərlərin 35,43 %-i və ya 6 milyon 569 min 244-ü paytaxt Bakı şəhərinə, qalan 64,57 %-i və ya 11 milyon 971 min 941-i (64,57 %) isə digər şəhər və rayonlarımıza edilib. Bakı şəhəri istisna olmaqla, ən çox daxili turizm səfəri edilən rayonların siyahısında Qəbələ rayonu ilk sırada qərarlaşıb. Daha dəqiq desək, cari ilin ilk 9 ayında Qəbələ rayonuna 1 milyon 186 min 015 turizm səfəri həyata keçirilib. Bu da Bakı istisna olmaqla, ümumi səfərlərin 6,4 %-i deməkdir. 990 min 151 səfər ilə Qusar rayonu ikinci, 968 min 550 səfər ilə Quba rayonu üçüncü sıranı tutub.

Cari ilin yanvar-sentyabr aylarında istirahət üçün həyata keçirilən turizm səfərlərinin 27,37%-i və ya 1 milyon 911 min 69 səfəri paytaxt Bakıya, 72,63%-i və ya 5 milyon 071 min 379 səfər isə digər şəhər və rayonlarımıza edilib.

Bakı şəhəri istisna olmaqla, istirahət məqsədilə ən çox səfər edilən bölgə Qəbələ rayonu olub və həmin məqsədlə buraya 756 min 885 turizm səfəri həyata keçirilib.

İkinci sırada Qusar rayonu qərarlaşıb ki, həmin dövrdə bu bölgəyə 586 min 570 səfər həyata keçirilib.

Üçüncü sıradakı Quba rayonuna baş tutan istirahət məqsədli turizm səfərlərinin sayı isə 582 min 827-ə bərabər olub.