Quba rayonunda üç nəfər sahibsiz itlərin hücumuna məruz qalıb. Aralarında azyaşlı da olan şəxslər xəstəxanaya yerləşdirilib. Bu hadisə sahibsiz küçə itləri ilə bağlı məsələni yenidən gündəmə gətirib.
Baş verən və insanları narahat edən məsələ ilə bağlı Qəçrəş kənd bələdiyyəsinin sədri Vüqar Kərimov Shimal.News-a açıqlama verib.
Sədr bildirib ki, ötən günün birinci yarısında Küsnətqazma kəndində azyaşlını it dişləməsi ilə bağlı məlumat daxil olub. Bir saat sonra Qəçrəş kəndində də qadın küçə itlərinin hücumuna məruz qalıb:
“İlk növbədə kənd məktəbi nəzarətə götürüldü. Hər üç hadisə şahidi onlara hücum edən itin rəngi və görünüşü barədə məlumat veriblər. Bu it kənardan gətirilib, turistlər özləri ilə heyvanlarını istirahətə gətirir. Ola bilsin buraxıblar gəzsin, o da nəzarətsiz qalıb”.
V.Kərimov kənd ərazisində sahibsiz itlərlərlə bağlı bildirib ki, heyvanlar əvvəllər restoranlar olan əraziyə toplaşırdı. Sonra onlar sığınacaqlara daşınıblar və hazırda ərazidə sahibsiz küçə itlərinə o gədər çox rast gəlinmir/
Xatırladaq ki, Quba rayonunun Qəçrəş və Küsnətqazma kəndlərində sakinlər sahibsiz itlərin hücumüna məruz qalıblar.
Məlum olub ki, Küsnətqazma kənd sakini 5 yaşlı Məhəmməd Nurlan oğlu Məhəmmədov, Qəçrəş kənd sakini 65 yaşlı Zöhrə Aslan qızı Mərdiyeva və 66 yaşlı Raida Osmanpaşa qızı Salahova ağır xəsarətlər alıblar.
