Ölkəmizdə kitabxanaların ümumi sayı 10 il əvvəlki ilə müqayisədə azalmağa doğru gedir. Belə ki, 2015-ci ildə kütləvi kitabxanaların ümumi sayı 3242 idisə, Dövlət Statistika Komitəsinin son statistik məlumatlarına görə bu rəqəm 2913-ə düşüb.
Modern.аz-ın məlumatına görə, ölkə üzrə ən çox kitabxana Xankəndinin üzərinə düşür. Burada 163 kitabxana fəaliyyət göstərir.
Paytaxtda kütləvi kitabxanaların ümumi sayı isə 97-dir. Kitabxanların ən çox olduğu digər yerlərə isə inzibati ərazi olaraq böyük rayonlar daxildir. Belə ki, Qubada 85, Kəlbəcərdə 80, Laçında isə 75 kitabxana fəaliyyət göstərir. Bundan əlavə Şəmkir və Ağdaş da kütləvi kitabxana sayına görə digər rayonlardan fərqlənir. Şəmkirdə ümumilikdə 74, Ağdaşda isə 70 kitabxana fəaliyyət göstərir.
Sumqayıt, Gəncə və Mingəçevir şəhərlərində isə kitabxanaların sayı azlıq təşkil edir. Belə ki, əhalisinin sayında görə ən böyük ikinci şəhərimizdə kitabxanaların ümumi sayı 12-dir, Gəncədə bu rəqəm 25, Mingəçevirdə isə 13-dür.
Ölkəmizdə bir kitabxananın fəaliyyət göstərdiyi rayonlar isə Naftalan və Qubadlıdır. Eyni zamanda Zəngilan, Xocavənd, Şirvan və Xızıda da kitabxanaların sayı azlıq təşkil edir.
