Quba rayonunun Gümürdəhnə kəndinə ayının hücum edərək kənd təsərrüfatı heyvanlarına zərər vurmasının səbəbi açıqlanıb
Shimal.News xəbər verir ki, rayon mərkəzindən 75 km uzaqlıqda, yüksək dağlıq ərazidə yerləşən kəndin sakinləri əsasən maldarlıqla məşğul olurlar.
Kəndə ayıların hücumu sakinləri təşvişə salıb. Son iki ay ərzində vəhşi heyvanlar 6 iri buynuzlu heyvanı parçalayıb, 10-a yaxın heyvanı isə, yaralayıb.
Ekoloqlar bildirir ki, meşələrdə yaşayan vəhşi heyvanların kəndlərə daxil olmasının səbəbi heyvanların yem bazasının azalmasıdır. Baytarlar vəhşi heyvanların quduzluğa qarşı peyvəndləməsini vacib hesab edirlər.
Baytar həkim Səməndər Məhərrəmov bildirir ki, hər il helikopterlər vasitəsilə meşə zolaqlarına quduzluq vaksinləri səpilir:
"Vəhşi heyvanlar təsərrüfata ziyan vurduqda həmin heyvanların sahibi özəl baytar həkimlərə məlumat verir. Həkim həmin əraziyə gəlir, ölmüş heyvanları ayırır, basdırır. Yerini dezinfeksiya edir. Sağlam heyvanlar da peyvəndlənir."
Qeyd edək ki, 2013-cü ildən ayıların adı "Qırmızı kitab"a daxil edilib və ölkədə ayı ovuna qadağa qoyulub.
