Sumqayıt Apellyasiya Məhkəməsində qəsdən adam öldürməkdə təqsirləndirilən Eynulla Musayevin barəsində çıxarılan hökmdən verilmiş apellyasiya şikayətinə baxılıb.
Pravda.az-ın məlumatına görə, hakim Rəşadət Ağayevin sədrliyi ilə keçirilən prosesdə qərar elan olunub.
Məhkəmənin qərarına əsasən, apellyasiya şikayəti təmin edilməyib.
İttihama görə, 1974-cü il təvəllüdlü Eynulla Musayev Cinayət Məcəlləsinin 120.2.2, 120.2.4, 120.2.9 və 157.1-ci maddələri ilə təqsirli bilinərək məhkum olunub.
Məhkəmə istintaqı zamanı müəyyən edilib ki, Eynulla Musayev əvvəllər — 2013-cü il dekabrın 4-də Bakı Ağır Cinayətlər Məhkəməsinin hökmü ilə adam öldürməyə görə 9 il azadlıqdan məhrumetmə cəzasına məhkum edilib və 2022-ci il aprelin 27-də şərti olaraq vaxtından əvvəl azadlığa buraxılıb.
İttihama əsasən, o, keçmiş arvadı ilə münasibətləri bəhanə edərək həmkəndlisi, 57 yaşlı Akif Qəribovu öldürmək qərarına gəlib.
2024-cü il oktyabrın 12-də, saat 21 radələrində, Xaçmaz rayonunun Köhnə Xaçmaz kəndində yerləşən fərdi yaşayış evinə qanunsuz daxil olan Eynulla Musayev, zərərçəkmişin müdafiə olunmağa qadir olmadığı vəziyyətdə onun baş və bədən nahiyəsinə dəfələrlə yumruq zərbələri endirib.
Nəticədə, Akif Qəribov komaya düşüb və hadisədən az sonra həyatını itirib.
Sumqayıt Ağır Cinayətlər Məhkəməsinin hökmü ilə Eynulla Musayev 17 il müddətinə azadlıqdan məhrum edilib.
Qeyd edək ki, Eynulla Musayev 2013-cü ildə həyat yoldaşı, 38 yaşlı Şərqiyyə Musayevanı başını kəsərək qətlə yetirib.
