Ölkəmizin bir sıra bölgələrində, o cümlədən Quba və Qusar rayonlarında yerləşən bəzi arıxanalarda “Tropilaelaps” arı gənəsi yayılıb.
Shimal.News xəbər verir ki, Azərbaycanda ilk dəfə rast gəlinən bu xəstəlik hazırda Qubanın Alpan kəndində, Qusarın Çiləgir kəndində, Qaxın Ləkit kəndində, eyni zamanda Şamaxı, Biləsuvar və Astara rayonlarındakı arı təsərrüfatlarında müşahidə edilir.
Qusar rayonunun Çiləgir kəndində yerləşən təsərrüfatda 70 arı ailəsindən 20-si artıq tələf olub, 50-ə yaxın arı ailəsinə də bu gənə daraşıb. Arıçılar bildirir ki, təcili qabaqlayıcı tədbirlər görülməsə, bu xəstəliyin yayılması sürətlənəcək və ölkədə çox sayda arı ailələrinin tələfinə səbəb olacaq.
“Tropilaelaps” arı ailələrində bala qoyma ərəfəsində sürfələrin içinə daxil olur və süfrələri yeyir, bu da arı ailələrini inkişafdan saxlayır.
Təsərrüfat sahibi Samir Gülməmmədov bildirir ki, bu zərərvericilərə qarşı mübarizə aparmaq olar. Bunun üçün ana arını qəfəsə salıb, qarışqa turşusu (Formik asit) pereparatından istifadə eləmək olar.
Məlumat üçün deyək ki, arı gənəsi Tropilaelaps ilk dəfə 60 il öncə Hindistan və Vyetnamda rast gəlinib. Sonradan isə Rusiya ərazisinə yayılıb.
