Quba Azərbaycana bəxş etdiyi elm və incəsənət xadimləri, dövlət adamları ilə də məşhurdur. Onlardan biri də 1945-ci ildə Rustov kəndində doğulan aktrisa Zərnigar Ağakişiyevadır. Zərnigar anasının ikinci evliliyindən dünyaya gəlib. 12 yaşı olanda ulu babasının adını özünə soyad kimi götürüb. Anasının ilk evliliyindən olan qardaşı ilə yola getməyən Zərnigar kasıb həyatdan və tənhalıqdan qaçaraq evlərini tərk edir. Qonşudan borc alaraq Bakıya köçən Zərngirar həm işləyib, həm də oxuyub.
Heç vaxt ailə qurmayan aktrisanın həyatında unuda bilmədiyi məhəbbəti olub. Onun kimliyini Zərnigar heç vaxt açıqlamasa da, sevgilisindən sənətə görə ayrıldığını etiraf edib. İlk sevgisi daşa dəyən aktrisa illər sonra nikahsız birlikdə yaşasa da, bu bərabərliyin də sonu olmayıb. 13 ildən sonra bu şəxsdən ayrılan Zərnigar ömrünün sonuna qədər tənhalığı seçib. Heç vaxt övlad sahibi ola bilməyən aktrisaya maddi çətinliyi də körpələr evindən uşaq götürməyə imkan verməyib. Zərnigar sənətinə o qədər bağlı olub ki, tamaşaların birində teatr ayaqqabı almadığı üçün səhnəyə ayaqyalın çıxıb. Onun küsülü olduğu həmkarı Safura İbrahimova Zərnigar dünyasını dəyişdikdən sonra bundan peşman olduğunu etiraf edib.
1989-1992-c illərdə cəmi iki rol verildiyi üçün Ağakişiyeva teatrdan uzaqlaşır. Amma 7 il sonra Ədalət Vəliyev onu yenidən teatra dəvət edir. Xəstəliyi irəliləyən, yaddaşı zəifləyən Zərnigar verilən rolun mətnini əzbərləyə bilmədiyi üçün teatr səhnəsi ilə vidalaşır. Hətta teatrda onun üçün vida məclisi də qurulur. Amma bu ayrılıqdan qısa müddət sonra məşhur aktrisa həyatla da vidalaşır. Ömrü boyu təklikdən qorxan, uzun illər şəkər xəstəliyindən əziyyət çəkən Xalq artisti 2018- ci il fevralın 8-də ürək çatışmazlığından yaşadığı evdə tək-tənha vəfat edir və yalnız ölümündən 3 gün sonra tapılır.
