Azərbaycan Dövlət Pedaqoji Universitetinin (ADPU) Quba filialının Humanitar və Təbiət Elmləri fakültəsinin dekan müavini, İctimai elmlər kafedrasının baş müəllimi Mürvət Əliyev fəlsəfə doktoru elmi dərəcəsinə layiq görülüb.
Shimal.News xəbər verir ki, bu barədə qərar Azərbaycan Respublikasının Prezidenti yanında Ali Attestasiya Komissiyası Kollegiyasının 24 oktyabr 2025-ci il tarixli iclasında qəbul edilib.
Mürvət Əliyevə fəlsəfə doktoru diplomu 21 noyabr 2025-ci il tarixində AAK-da rəsmi şəkildə təqdim edilib.
Qeyd edək ki, Mürvət Əliyev AMEA-nın Naxçıvan bölməsinin nəzdində fəaliyyət göstərən ED 1.13 Dissertasiya Şurasında “Azərbaycanın Borçalı və Qazax-Şəmşəddil bölgələri uğrunda Gəncə xanlığı ilə Rusiya-Gürcüstan bloku arasında mübarizə” mövzusunda dissertasiya işini müdafiə edib.
Tədqiqatda Nadir Şah tərəfindən Borçalı və Qazax bölgələrinin idarəsinin gürcü hakimlərinə verilməsi məsələsinə tarixi baxış, həmin dövrdə bölgədə həyata keçirilən siyasətin mahiyyəti, Şəmşəddil probleminin tarixi kökləri və Gəncə xanlığının bölgədə apardığı mübarizə geniş şəkildə araşdırılıb. Dissertasiya, həmçinin Rusiyanın Cənubi Qafqaza doğru işğalçı yürüşlərini, Cavad xanın sonadək göstərdiyi müqavimətin Azərbaycan azadlıq hərəkatı tarixindəki rolunu tarixi faktlar əsasında təhlil edir.
Elmi iş AMEA-nın Tarix İnstitutunun “Azərbaycanın yeni tarixi və Azərbaycan xalqına qarşı soyqırımları tarixi” şöbəsində yerinə yetirilib. Dissertasiyanın elmi rəhbəri tarix elmləri doktoru, professor Camal Mehdi oğlu Mustafayev olub.
