Quba şəhəri, Qırmızı qəsəbə ərazisində taksi sürücüsü döyülüb.
Demokrat.az-ın məlumatına görə, hadisə bu il fevralın 12-də, gecə saat 1 radələrində baş verib.
Quba rayon sakini, 41 yaşlı Sərxan şəxsi münasibətlər zəminində yaranan mübahisə zamanı taksi sürücüsü Zamiri (adlar şərtidir – red.) yumruqla vuraraq ona xəsarət yetirib.
Hadisəni törədən Sərxanın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Məhkəmədə təqsirləndirilən şəxs özünü təqsirli bilib. O ifadəsində bildirib ki, fevralın 12-də, saat 01:00 radələrində şəhərə getmək üçün sistem üzərindən taksi sifariş verib:
“Taksi gələndə pulumun olmadığını dedim. Səhər sürücüyə 15 manat verəcəyimi bildirdim, amma o razılaşmadı və sifarişin 5 manat ödənişini tələb etdi. Bu zaman aramızda mübahisə yarandı. Mübahisə zamanı onu təhqir etdim və yumruqla vurdum”.
Quba Rayon Məhkəməsinin hökmü ilə Sərxana doqquz ay müddətinə azadlığın məhdudlaşdırılması cəzası təyin edilib.
Bu müddət ərzində onun Quba rayonunu tərk etməsi qadağan olunub, həmçinin axşam saat on ikidən səhər yeddiyədək evdən çıxmaması və elektron nəzarət vasitəsi gəzdirməsi tapşırılıb.
